RhMC Cynghrair ar y Cyd - Aberystwyth

Tîm cymysg Menai yn rasio trwy'r tonnau

Roedd yr amodau'n llawer mwy ffafriol yn Aberystwyth eleni, o'i gymharu â’r ras gafodd ei chanslo’n rhannol y llynedd ond roedd y dŵr yn dal yn eithaf garw o'i gymharu â'r hyn yr ydym ni wedi arfer ei rwyfo ar y Fenai.

Mae Aberystwyth yn un o dair ras gynghrair ar y cyd lle mae clybiau o Gynghrair y Gogledd a Chynghrair y De yn cystadlu yn erbyn ei gilydd ac roedd yn fore prysur yn y marina wrth i 24 o gychod o 12 clwb aros i allu lansio i'r dŵr cyn cael brecwast a’r sesiwn briffio cocsys.

Cybi yn paratoi i rasio

Ras y merched oedd y gyntaf i gychwyn gydag 17 o gychod yn brwydro am safle ffafriol ar y llinell gychwyn allan ym Mae Ceredigion. Roedd y ras fer 6km yn cychwyn trwy rwyfo 1.5km yn erbyn llan tua’r de cyn troi tua'r gorllewin ar draws y tonnau am 1.5km arall ac yna gwibiad o 2km yn ôl i'r harbwr a’r llinell derfyn.

Llwyddodd Blodwen o Glwb Rhwyfo Porthmadog i barhau â’u dechreuad gwych i'r tymor gyda buddugoliaeth wych mewn ras hynod o gryf, gan guro'r ddau griw o Glwb Rhywfo Llangwm sydd, ar hyn o bryd, yn arwain eu categorïau yng Nghynghrair y De.

Gorffennodd Cybi o Beaumaris yn y pumed safle clodwiw iawn, dim ond 39 eiliad y tu ôl i'r cwch buddugol a gan rasio'n galed i'r llinell ochr yn ochr a Cyngar Stinger o Langwm gyda dim ond pum eiliad yn gwahanu'r ddau gwch.

Gwelodd ras y dynion 13 o gychod yn cystadlu gyda record 100% cwch Clychau o Aberdyfi yn parhau wrth iddynt ennill y ras mewn 26’21”. Daeth y ddau gwch sy’n arwain Cynghrair y  De, Kiddles o Llangwm a Moby Dick o Glwb Rhwyfo Jemima Abergwaun ac Wdig, yn ail a thrydydd gyda Menai o Beaumaris yn cadw ar y blaen i griw penderfynol Ceridwen o Aberystwyth er mwyn sicrhau’r pedwerydd safle.

Tîm y dynion yn rasio yn Cybi

Wrth i’r gwynt godi, byrhawyd cwrs y Ras Cymysg, ras olaf y dydd, i 5km, a chyda 21 o gychod yn rasio, roedd y llinell gychwyn yn anhrefn llwyr wrth i gychod geisio dod o hyd i’r safle gorau tra’n brwydro yn erbyn y gwynt oedd yn chwythu pawb yn ôl tua’r harbwr!

Ar ôl sawl munud o badlo, padlo am yn ôl, gwthio, cwffio a bygwth gwaharddiad, llwyddodd y ras i gychwyn mewn rhyw fath o drefn!

Yn union fel yn ras y dynion, llwyddodd Clychau o Aberdyfi i gynnal eu record 100%, gyda Kiddles o Langwm yn gorffen yn yr ail safle. Llwyddodd Branwen o Aberystwyth i orffen ychydig ar y blaen i Menai o Beaumaris a chipio’r trydydd safle.

Mae pedwerydd safle Menai yn eu gweld yn cau'r bwlch ar Siwan yn nghategori'r Fets yng Nghynghrair y Gogledd. Er i Siwan orffen yn y 9fed safle mae’r criw dal ar y blaen o 27 pwynt o'i gymharu â 23 pwynt Menai.

Disgwyl y canlyniadau

Roedd y croeso yn Aberystwyth mor gynnes ag erioed gyda'r holl rwyfwyr yn cymdeithasu dros ginio ar ôl y ras wrth aros am y seremoni canlyniadau ac edrych ymlaen at Ras Cynghrair y Gogledd nesaf yn Beaumaris ar 19 Gorffennaf.