Cychwyn y tymor yn Montford

Menai yn paratoi i rwyfo

Yn ras gyntaf y tymor, gwelwyd dau griw o Beaumaris yn gyrru dros y ffin i'r Amwythig ar gyfer Her Montford.

Mae'r Montford yn adnabyddus am fod yn ras anodd, yn enwedig gan mai dyma'r ras gyntaf ar ôl gaeaf hir, ond wrth i ni gyrraedd Clwb Cychod Pengwern, a enwyd ar ôl prifddinas Teyrnas hynafol Powys, roedd hi'n ddiwrnod hyfryd o wanwyn.

Diolch i'r drefn, roedd lefelau'r afon wedi gostwng yn ystod yr wythnos, sy'n golygu bod llif yr afon y byddem yn rhwyfo yn ei herbyn ychydig yn llai brawychus nag arfer!

Ar ôl dal i fyny gyda hen ffrindiau o Borthmadog, Ynys Môn, Aberdyfi, Aberystwyth a Chaergybi ac ar ôl bwyta sawl bap brecwast, roedd hi'n bryd rhwyfo.

Cybi yn rhwyfo i fyny'r afon

Mae'r ras yn ras mewn dwy ran gyda'r cychod yn cael eu hamseru wrth rwyfo wyth milltir i fyny'r afon o'r Amwythig i bwynt mwyaf gogleddol Afon Hafren, a elwir yn lleol yn Begwn y Gogledd, cyn rhwyfo'n hamddenol chwe milltir yn ôl i lawr yr afon cyn ail ran y ras, sef sbrint dwy filltir i'r llinell derfyn yn ôl ym Mhengwern.

Dewiswyd trefn y cychod ar hap gyda Cybi, criw cymysg Beaumaris o Nia, Gwyn, John a Vicky dan arweiniad Jan, yn dechrau yn y 12fed safle a chriw dynion Menai o Mike, Arwel, Justin a Simon dan arweiniad Cindy yn dechrau yn y 22ain safle o'r 24 cwch.

Er i lefelau'r afon ostwng, roedd y cymal i fyny'r afon yn dal i fod yn rhan anodd iawn gyda'r cocswyr yn gorfod dod o hyd i gyfleoedd prin o basio cychod eraill yn ogystal ag osgoi coed isel a choed wedi cwympo tra'n osgoi'r glannau bas.

Bu'n rhaid i Menai hefyd wynebu ymosodiad gan alarch wedi i'r gwch fynd ychydig yn rhy agos at yr aderyn!

Y 200 metr olaf cyn cyrraedd Pegwn y Gogledd, oedd y dŵr caletaf o'r diwrnod ac yn brawf gwirioneddol o gymeriad, cryfder a phenderfyniad y rhwyfwyr.

Ar ôl gorffwys byr ym mhwynt mwyaf gogleddol Afon Hafren, roedd yn siwrne gymharol hamddenol am y chwe milltir cyntaf yn ôl tua Phengwern gan gael cyfle i fwynhau heddwch a thawelwch ffiniau Swydd Amwythig.

Daeth y sbrint dros y ddwy filltir olaf yn ychydig o sioc i'r system ar ôl y chwe milltir hamddenol yn arwain ato, ond roedd rasio o faes y sioe drwy'r dref i'r llinell derfyn yn ddiweddglo gwych i ddiwrnod gwych.

Cyflwynwyd y gwobrau gan Syr Edward Tate, ffermwr a thirfeddiannwr amlwg o Swydd Amwythig sy'n byw yn The Isle, ystâd o 1682 ar Afon Hafren ger Amwythig.

Gorffennodd Menai yn ail yn yn y ras tu ôl i griw cryf Aberdyfi oedd yn rasio yng Nghlychau, ond roeddent yn fuddugol yn y categori Fet tra bod Cybi yn drydydd clodwiw iawn yn y categori cymysg.

Diolch i Glwb Rhwyfo Antur Amwythig am gynnal digwyddiad gwych i gycxhwyn y tymor ac am gwledd o fwyd ar ôl y ras.

Menai yn casglu eu tlws (Ch i Dd) Simon, Arwel, Justin, Cindy a Mike