RhMC - Cynghrair y Gogledd Beaumaris

Seiriol, Cybi a Siwan yn troi am adref

Fel sy'n wir bob amser gyda'n ras gynghrair gartref, cawsom nifer fawr yn rasio gydag 14 o gychod y Clwb allan yn y tair ras yn ogystal â chast cefnogol anhygoel o swyddogion ras, cychod diogelwch, tîm llinell, cogyddion, pobl tu ôl i'r bar a golchwyr a sychwyr llestri o fri, er mwyn sicrhau bod y croeso mor gynnes ag erioed yn Beaumaris. Roedd pedwar deg tri o gychod o naw clwb gwahanol wedi cyrraedd Beaumaris ar fore eithaf gwyntog. Roedd y gwynt yn chwythu hyd at 20mya dros y llanw, ond ar ôl gadael y penderfyniad terfynol mor hwyr â phosibl, roedd swyddogion y ras yn ddigon hyderus i anfon cychod y menywod allan ar gyfer y ras gyntaf.

Roedd y rasio o Glwb Hwylio Brenhinol Ynys Môn yn gyflym ac yn dyn wrth i'r cychod fynd gyda'r gwynt tuag at y bwi yn Fryar's Bay, ond cyn gynted ag y trodd y cychod yn ôl i'r gwynt, cafodd y ras ei chwythu'n ddarnau, yn llythrennol.

Gyda'r gwynt cryf yn achosi pob math o broblemau, gwnaed y penderfyniad hanner ffordd drwy'r ras i gwtogi'r cwrs. Ni fyddai'r ras bellach yn mynd allan i'r pier i rowndio B10 cyn dychwelyd i'r llinell orffen, ond yn hytrach yn mynd yn syth at y llinell orffen. Defnyddiodd tîm cryf Menai (Categori Agored) a oedd wedi brwydro yn erbyn y gwynt a'r tonnau i ddod adref yn bedwerydd yn Aberystwyth y mis diwethaf eu cryfder a'u profiad i sicrhau ail safle rhagorol y tu ôl i Aberdyfi gyda MYC Porthmadog yn dod yn drydydd ac hefyd yn ennill y categori Fet.

Brwydrodd Mabli (Fet), Siwan (UwchFet), Cybi (UwchFet) a Seiriol (UwchFet) i gyd yn galed yn erbyn yr elfennau i gwblhau'r cwrs gyda Siwan hefyd sicrhau buddugoliaeth yn y categori UwchFet.

Cychwyn ffrantig i'r ras Agored

Gan nad oedd y gwynt yn debygol o dawelu, gwnaeth swyddogion y ras y penderfyniad i gwtogi'r cwrs ar gyfer y categorïau agored a chymysg. Daeth y ras bellach yn sbrint 3km o'r RAYC i Fryar's Bay ac yn ôl i'r llinell orffen. Gwelodd y ras agored ddiweddglo cyffrous wrth i Menai (Fet) ennill y ras o 4 eiliad er gwaethaf ymdrechion hwyr Clychau (Agored) o glwb Aberdyfi a sicrhau eu hail fuddugoliaeth yn olynol y tymor yn dilyn eu buddugoliaeth flaenorol ym Mhorthmadog.

Gorffennodd Afon o Aberdyfi yn drydydd yn y categori UwchFet.

Wrth i gychod baratoi ar gyfer y ras gymysg, roedd yn ymddangos y byddai'n ddiweddglo gwlyb i'r prynhawn wrth i gymylau dywyllu a'r gwynt ddod â rhywfaint o law ysgafn i mewn o'r gorllewin.

Menai (Fet) aeth ar y blaen yn gynnar yn y ras gan lynu wrth y lan ac aros allan o'r gwynt ond cymerodd Clychau (Agored), oedd hyn edrych i dalu'r pwyth yn ôl hyn dilyn eu colled yn y ras flaenorol, reolaeth ar y ras wrth i'r timau agosáu at y bwi.

Ceisiodd Menai i gau'r bwlch ar Clychau wrh i'r cychod frwydro efo'r gwynt a'r tonnau ond roedd eu hymdrech yn ofer wrth i Clychau ddal eu tir ac i wneud pethau'n waeth, llwyddodd Eirianell (Fet) o Glwb Rhwyfo Moelfre i fachu'r ail safle wrth i'r cychod ddod am y llinell derfyn.

Dim ond 30 eiliad oedd rhwng y tri cwch cyntaf, gydag Afon o Aberdyfi yn gorffen yn bedwerydd i ennill y categori UwchFet.

Diolch i holl wirfoddolwyr y clwb a wnaeth hi'n ddiwrnod mor wych o rasio i bawb a gymerodd ran, ac edrychwn ymlaen at wahodd pawb yn ôl ar gyfer Ras Ynys Seiriol ar 19 Gorffennaf.